Kalam e Bulleh Shah
Ais Nionh Di Ulti Chaal
Sabar ne jad nionh lagaya
Wikh pia ne keh dikhlaya
Ragg ragg ander karam chilaya
Zor aor di gal muhal
Ais nionh di ulti chaal
Zakriya ne jad paya khara
Jis dam wajia ishaq naqara
Dharia sar te tikha aara
Kita aid zawaal
Ais nionh di ulti chaal
Jadd yayaa ne paii jhati
Ramz ishaq di laii kati
Jalwa ditta apna zaati
Tann khanjar kita laal
Ais nionh di ulti chaal
Aap ashara akh da kita
Taan madhwa mansoor ne pita
Suli char ke darshan lita
Hoya ishaq kamal
Ais nionh di ulti chaal
Suliman noon ishaq jo aaya
Mundra hathon cha gawaya
Takhat na parian da phir aaya
Bith jhoke, thi be haal
Ais nionh di ulti chaal
Bullah shah hun chup changeri
Na kar aithe aid daleri
Gal na rehndi teri meri
Chad de sare wahm khial
Ais nionh di ulti chaal
Shahmukhi
صابر نے جد نیونہہ لگایا
ویکھ پیا نے کیہہ دکھلایا
رگ رگ اندر کرم چلایا
زور اور دی گل محال
ایس نیونہہ دی اُلٹی چال
زکریا نے جد پایا کھارا
جس دم وجیا عشق نقارا
دھریا سر تے تکھا آرا
کیتا ایڈ زوال
ایس نیونہہ دی اُلٹی چال
جد یحیی نے پائی جھاتی
رمز عشق دی لائی کاتی
جلوہ دِتا اپنا ذاتی
تن خنجر کیتا لال
ایس نیونہہ دی اُلٹی چال
آپ اشارہ اکھ دا کیتا
تاں مدھوا منصور نے پیتا
سولی چڑھ کے درشن لیتا
ہویا عشق کمال
ایس نیونہہ دی اُلٹی چال
سلیمان نوں عشق جو آیا
مُندرا ہتھوں چا گوایا
تخت نہ پریاں دا پھر آیا
بھٹھ جھو کے، تھی بے حال
ایس نیونہہ دی اُلٹی چال
بلھے شاہ ہن چُپ چنگیری
نہ کر ایتھے ایڈ دلیری
گل نہ بندی تیری میری
چھڈ دے سارے وہم خیال
ایس نیونہہ دی اُلٹی چال