Kalam e Bulleh Shah
Hun Kis Then Aap Chupaida
Hun kis thin aap chupaida
Kitte mullah bang balende ho
kitte sunat farz dasende ho
Kitte raam dohai dende ho
Kithe mathe tilk lagaida
Hun kis thin aap chupaida
Main meri he, k teri he
Eh ant bhasam di gheri he
Dheri noon nach nachaida
Hun kis thin aap chupaida
Kitte binso chora paao ge
Kitte jora pa handhao ge
Kitte aadam hawwa ban aao ge
Kadi methon hi bhul jaida
Hun kis thin aap chupaida
Jo bhal tusadi karda he
moiyaan toon agge marda he
moiyan bhi tethon darda he
Matt moiyan morr kohaida
Hun kis thin aap chupaida
Banda ban main gowaan charawe
Lanka charh ke naad wijawe
Makke da ban haji aawe
Wahwa rang wataida
Hun kis thin aap chupaida
Mansoor tussan te aaya he
Tussan sooli pagar charhaya he
Mera bhai babul jaya he
Dio khon baha mere bhai da
Hun kis thin aap chupaida
Tussin sabhnin bhesin thende ho
Menoon har ja tussin dasende ho
Madh aape aape pende ho
Aape ko aap chukaida
Hun kis thin aap chupaida
Hun paas tusade wassan gi
Na be dil ho ke nassan gi
Sabh bhait tusade dassan gi
Kiun menoon ang na laida
Hun kis thin aap chupaida
Wah jis par karam ohia he
Tehqiq oh bhi tein jeha he
Sach sahih rawaet eha he
Teri nazar mehar tar jaida
Hun kis thin aap chupaida
Wich bhanbar bagh lowaida
Jehra wichon aap wikhaida
Jaan alifon ahad banaida
Taan baatan kia batlaida
Hun kis thin aap chupaida
Bullah hun sahih sanbhalte ho
Har soorat naal pichate ho
Kitte aate ho, kitte jate
Hun methon bhul na jaida
Hun kis thin aap chupaida
Bullah main shoh wal mahil haan
Jhab karo aanayat saail haan
Eh saail keh? Main ghahil haan
Ghahil toon aap chupaida
Hun kis thin aap chupaida
ہن کس تھیں آپ چھپائیدا
ہن کس تھیں آپ چھپائیدا
کِتے ملاں بانگ بلیندے ہو
کِتے سنت فرض دسیندے ہو
کِتے رام دہائی دیندے ہو
کِتے متھے تلک لگائیدا
ہن کس تھیں آپ چھپائیدا
میں میری ہے،کہ تیری ہے
ایہہ انت بھسم دی ڈھیری ہے
ایہہ ڈھیری پیا گھیری ہے
ڈھیری نوں ناچ نچائیدا
ہن کس تھیں آپ چھپائیدا
کِتے بینسر چوڑا پاو گے
کِتے جوڑا پا ہنڈھاو گے
کِتے آدم حوا بن آو گے
کدی میتھوں بی بھل جائیدا
ہن کس تھیں آپ چھپائیدا
باہر ظاہر ڈیرہ پایو
آپے ڈھوں ڈھوں ڈھول بجایو
جگ تے اپنا آپ جتایو
پھر عبداللہ دے گھر دھائیدا
ہن کس تھیں آپ چھپائیدا
جو بھال تساڈی کردا ہے
مویاں توں اگے مردا ہے
مویاں بھی تیتھوں ڈردا ہے
مت مویاں موڑ کوہائیدا
ہن کس تھیں آپ چھپائیدا
بندا بن میں گئواں چراوے
لنکا چڑھ کے ناد وجاوے
مکے دا بن حاجی آوے
واہوا رنگ وٹائیدا
ہن کس تھیں آپ چھپائیدا
منصور تساں تے آیا ہے
تساں سولی پگڑ چڑھایا ہے
میرا بھائی بابل جایا ہے
دیو خون بہا میرے بھائی دا
ہن کس تھیں آپ چھپائیدا
تسیں سبھنیں بھیسیں تھیندے ہو
مینوں ہر جا تسیں دسیندے ہو
مدھ آپے، آپے پیندے ہو
آپے کو آپ چھکائیدا
ہن کس تھیں آپ چھپائیدا
ہن پاس تساڈے وساں گی
نہ بے دل ہوکے نساں گی
سبھ بھیت تساڈے دساں گی
کیوں مینوں انگ نہ لائیدا
ہن کس تھیں آپ چھپائیدا
واہ جس پر کرم اویہا ہے
تحقیق اوہ بھی تیں جیہا ہے
سچ صحیح روایت ایہا ہے
تیری نظر مہر تر جائیدا
ہن کس تھیں آپ چھپائیدا
وچ بھانبڑ باغ لوائیدا
جیہڑا وچوں آپ وکھائیدا
جاں الفوں احد بنائیدا
تاں باطن کیا بتلائیدا
ہن کس تھیں آپ چھپائیدا
بلھا ہن صحیح سنبھالتے ہو
ہر صورت نال پچھاتے ہو
کِتے آتے ہو، کِتے جاتے ہو
ہن میتھوں بھل نہ جائیدا
ہن کس تھیں آپ چھپائیدا
بلھا میں شوہ ول مائل ہاں
جھب کرو عنائت سائل ہاں
ایہہ سائل کیہہ؟ میں گھائل ہاں
گھائل توں آپ چھپائیدا
ہن کس تھیں آپ چھپائیدا