Kalam e Bulleh Shah
Kehnoon Lamakani Dasde Ho
Kehnoon lamakani dasde ho
Tussi har rang de wich wasde ho
Kan fayakoon tain aap kahaya
Tain bajhon hor kehra aaya
Ishqon sabh zahoor banaya
Aashiq ho k dasde ho
Kehnoon lamakani dasde ho
Tussi har rang de wich wasde ho
Pucho aadam kis ne aanda he
Kithon aaya kithe janda he
Othe kis da tenoon lanjha he
Othe kha dana uth nasde ho
Kehnoon lamakani dasde ho
Tussi har rang de wich wasde ho
Aape sunin te aap sunawin
Aape gawin te aap bajawin
Hathon qol sarood sunawin
Kithe jahil ho k nasde ho
Kehnoon lamakani dasde ho
Tussi har rang de wich wasde ho
Teri wahdat toyin bujhawin
Anal haq di taar halawin
Suli te mansoor charhawin
Utte kol khalo k hasde ho
Kehnoon lamakani dasde ho
Tussi har rang de wich wasde ho
Kitte roomi ho, kitte zangi ho
Kitte topi posh farangi ho
Kitte me khane wich bhangi ho
Kitte mehr mehri ban wasde ho
Kehnoon lamakani dasde ho
Tussi har rang de wich wasde ho
Bullah shah aanayat aaras he
Oh mere dil da waris he
Main loha te oh paaras he
Tussi ose de sang khasde ho
Kehnoon lamakani dasde ho
Tussi har rang de wich wasde ho
کیہنوں لامکانی دسدے ہو
کیہنوں لامکانی دسدے ہو
تسی ہر رنگ دے وچ وسدے او
کن فیکون تیں آپ کہایا
تیں باجھوں ہور کیہڑا آیا
عشقوں سبھ ظہور بنایا
عاشق ہوکے دسدے او
کیہنوں لامکانی دسدے او
تسی ہر رنگ دے وچ وسدے او
پچھو آدم کس نے آندا ہے
کتھوں آیا کتھے جاندا ہے
اوتھے کس دا تینوں لانجھا ہے
اوتھے کھا دانا اُٹھ نسدے او
کیہنوں لامکانی دسدے او
تسی ہر رنگ دے وچ وسدے او
آپے سنیں تے آپ سناویں
آپے گاویں تے آپ بجاویں
ہتھوں قول سرود سناویں
کتھے جاہل ہو کے نسدے او
کیہنوں لامکانی دسدے او
تسی ہر رنگ دے وچ وسدے او
تیری وحدت توئیں بجھاویں
انا الحق دی تار ہلاویں
سُولی تے منصور چڑھاویں
اتے کول کھلو کے ہسدے ہو
کیہنوں لامکانی دسدے ہو
تسی ہر رنگ دے وچ وسدے ہو
کِتے رومی ہو،کِتے زنگی ہو
کِتے ٹوپی پوش فرنگی ہو
کِتے مے خانے وچ بھنگی ہو
کِتے مہر مہری بن وسدے ہو
کیہنوں لامکانی دسدے ہو
تسی ہر رنگ دے وچ وسدے ہو
بلھا شوہ عنائت آرس ہے
اوہ میرے دل دا وارث ہے
میں لوہا تے اوہ پارس ہے
تسی اوسے دے سنگ گھسدے ہو
کیہنوں لامکانی دسدے ہو
تسی ہر رنگ دے وچ وسدے ہو