Kalam e Bulleh Shah
Kiun Ishaq Assan Te Aaya He
Kiun ishaq assan te aaya he
Toon aaya he main paya he
Ibrahim cha chikha pawaiyo
Zikariye sar kaloter dharaiyo
Yousaf sanun hato hat dakaiyo
Kaho sanun keh liaya he
Kiun ishaq assan te aaya he
Toon aaya he main paya he
Shekh sanaanon khok charaiyo
Shams di khal ulat lahaiyo
Suli te mansoor charhaiyo
Kar hath hun main wal dhaya he
Kiun ishaq assan te aaya he
Toon aaya he main paya he
Jis ghar wich tera phera hoya
So jal bal koila dhair hoya
Jad rakh addi tad seer hoya
Kaho kis gal da sadhraya he
Kiun ishaq assan te aaya he
Toon aaya he main paya he
Bullah shah de karan kariye
Tan bhati mann aahran kariye
Parem hathora maran kariye
Dil loha agg pakaya he
کیوں عشق اساں تے آیا ہے
کیوں عشق اساں تے آیا ہے
توں آیا ہے میں پایا ہے
ابراہیم چا چخا سٹایو
زکریے سر کلوتر دھرایو
یوسف ہٹو ہٹ دکایو
کہو سانوں کیہہ لیایا ہے
کیوں عشق اساں تے آیا ہے
توں آیا ہے میں پایا ہے
شیخ صنعانوں خوک چرایو
شمس دی کھل الٹ لہایو
سُولی تے منصور چڑھایو
کر ہتھ ہن میں ول دھایا ہے
کیوں عشق اساں تے آیا ہے
توں آیا ہے میں پایا ہے
جس گھر وچ تیرا پھیرا ہویا
سو جل بل کوئلا ڈھیر ہویا
جد راکھ اڈی تد سیر ہویا
کہو کس گل دا سدھرایا ہے
کیوں عشق اساں تے آیا ہے
توں آیا ہے میں پایا ہے
بلھا شوہ دے کارن کریے
تن بھٹھی من آہرن کریے
پریم ہتھوڑا مارن کریے
دل لوہا اگ پکایا ہے