Kalam e Bulleh Shah
Se Wanjare Aaye Ni Maae
Se wanjare aaye ni maae, se wanjare aaye
lalaan da oh wanj karende, hoka aakh sunaae
Laal nahin gehne sathi, maae nale le jawan
Sunia hoka main dil guzari, main bhi laal liawan
Ik na ik kanna wich pa ke lokaan noo dikhlawan
Lok janan eh lalaan wali, lisaan main bharmaae
Se wanjare aaye ni maae, se wanjare aaye
lalaan da oh wanj karende, hoka aakh sunaae
Orak ja khaloti te main manun sadhrayian
Bhai we lalaan walio main bhi, laal lewan noo aai aan
Ohnaan bhare sandooq wikhale, menoon rejhaan aayian
Wekhe laal suhane sare, ik tadoon ik sawaae
Se wanjare aaye ni maae, se wanjare aaye
lalaan da oh wanj karende, hoka aakh sunaae
Bhai we lalaan walia, ehnaan da mul dasaayin
Je toon aai hain laal kharedan, dhar toon sis lahaain
Dmh kadi soii da dahiaa, sar kithon ditta jayin
Lazam ho k murr ghar aaii, puchan gawandi aaye
Se wanjare aaye ni maae, se wanjare aaye
lalaan da oh wanj karende, hoka aakh sunaae
Toon jo gai seen laal kharedan, uchi addi chaii ni
Kehra mohra othon ranin, toon le ke ghar aaii ni
Laal si bhare main sabkaan halki, khali kanni saii ni
Bhara laal anmala othon, methe chukia na jaae
Se wanjare aaye ni maae, se wanjare aaye
lalaan da oh wanj karende, hoka aakh sunaae
Kachi kach wahaj na janan, laal wahajan chali
Palle kharch na sakh na kaii, Hathon haran chali
Main moti mashtandi dissan, laal noon charan chali
Jis shah ne mul le ke dena, so shah monh na laae
Se wanjare aaye ni maae, se wanjare aaye
lalaan da oh wanj karende, hoka aakh sunaae
Gayian de wich pherin diwani, ni kuriye matiare
Laal chagindi nazuk haii, eh gal kon natare
Jaan main mul ohnaan toon puchia, mul karan oh bhare
Dumh soii da kade na dikhda, oh aakhan sar bare
Jehrian gayian laal wahajan, ohnaan sees lahaae
Se wanjare aaye ni maae, se wanjare aaye
lalaan da oh wanj karende, hoka aakh sunaae
سے ونجارے آئے نی مائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سنائے
لال نیں گہنے ساتھی، مائے نال لے جاواں
سنیا ہوکا میں دل گزاری، میں بھی لال لیاواں
اک نہ اک کناں وچ پا کے لوکاں نوں دکھلاواں
لوک جانن ایہہ لالاں والی، لیساں میں بھرمائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے
اوڑک جا کھلوتی تے میں منوں سدھرائیاں
بھائی وے لالاں والیو میں بھی ، لال لیون نوں آئی آں
اوہناں بھرے صندوق وکھالے، مینوں ریجھاں آئیاں
ویکھے لال سہانے سارے، اک توں اک سوائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے
بھائی وے لالاں والیا، ایہناں دا مُل دسائیں
جے توں آئی ہیں لال خریدن، دھڑ توں سیس لہائیں
ڈمھ کدی سوئی دا سہیا، سر کتھوں دتا جائیں
لازم ہو کے مڑ گھر آئی، پُچھن گوانڈی آئے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے
توں جو گئی سیں لال خریدن ، اُچی اڈی چائی نی
کیہڑا مہرا اوتھوں رنیں، توں لے کے گھر آئی نی
لال سی بھارے میں سباں ہلکی، خالی کنی سائی نی
بھارا لال انملا اوتھوں، میتھے چکیا نہ جائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے
کچی کچ وہاج نہ جاناں، لال وہاجن چلی
پلے خرچ نہ ساکھ نہ کائی، ہتھوں ہارن چلی
میں موٹی مشٹنڈی دساں، لال نوں چارن چلی
جس شاہ نے مُل لے کے دینا، سو شاہ مونہہ نہ لائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے
گیاں دے وچ پھریں دیوانی، نی کڑیے مٹیارے
لال چگیندی نازک ہائی ، ایہہ گل کون نتارے
جاں میں مل اوہناں توں پچھیا، مل کرن اوہ بھارے
ڈمھ سُوئی دا کدے نہ دکھادا، اوہ آکھن سر بارے
جیہڑیاں گئیاں لال وہاجن، اوہناں سیس لہائے
سے ونجارے آئے نی مائے، سے ونجارے آئے
لالاں دا اوہ ونج کریندے، ہوکا آکھ سُنائے