Kalam e Bulleh Shah
Tussi Karo Asadi Kari
Tussi karo asadi kari
Kehi ho gai wedan bhari
Oh ghar mere wich aaya
Os aa menun bharmaya
Pucho jadu he k saya
Os toon layo haqiqat sari
Tussi karo asadi kari
Kehi ho gai wedan bhari
Oho dil mere wich wasda
Bitha naal asade hasda
Puchan bataan taan uth nasda
Lay bazaan wang udari
Tussi karo asadi kari
Kehi ho gai wedan bhari
Main shoh daria pai aan
Thathaan lehraan de monh gai aan
Phar ke ghuman ghair bhoii aan
Uperon birkha rain andhari
Tussi karo asadi kari
Kehi ho gai wedan bhari
Sayiaan aid chanchar chaye
Tare kharian haith chupaye
Manj diyan rasiyaan naang banaye
Ehnaan sehraan toon bulhari
Tussi karo asadi kari
Kehi ho gai wedan bhari
Eh jo murli kahan wajaii
Dil mere noon chot lagaii
Aah de naare kardi aai
main rowan zaro zari
Tussi karo asadi kari
Kehi ho gai wedan bhari
Ishaq dewane likhan laiyaan
dadhiyaan ghanian sathiyaan paiyaan
Haan main bakri kol qasaiyaan
Rehnda seham hamisha bhari
Tussi karo asadi kari
Kehi ho gai wedan bhari
Ishaq rohila nahin jachda
Ander dharia bahar nachda
Menun dio snehra sach da
Mere karo koii gham khawari
Tussi karo asadi kari
Kehi ho gai wedan bhari
Main keh mehr muhabbat janaan
Saiyaan kardian zor dhagana
Gal gal mewa k badwana
Keh koii wed pasari
Tussi karo asadi kari
Kehi ho gai wedan bhari
No shoh jis da bans bareli
Tutti dalon rahi akeli
Koke bele beli beli
Ohdi kare koii dildari
Tussi karo asadi kari
Kehi ho gai wedan bhari
Bullah shoh de je main jawaan
Apna sar dhar phair na pawaan
Othe jawaan na dukh pawaan
Bheri ainwin umar guzari
Tussi karo asadi kari
Kehi ho gai wedan bhari
تسی کرو اساڈی کاری
تسی کرو اساڈی کاری
کیہی ہو گئی ویدن بھاری
اوہ گھر میرے وچ آیا
اوس آمینوں بھرمایا
پچھو جادو ہے کہ سایہ
اس توں لئو حقیقت ساری
تسی کرو اساڈی کاری
کیہی ہو گئی ویدن بھاری
اوہو دل میرے وچ وسدا
بیٹھا نال اساڈے ہسدا
پُچھاں باتاں تاں اُٹھ نسدا
لئے بازاں وانگ اڈاری
تسی کرو اساڈی کاری
کیہی ہو گئی ویدن بھاری
میں شوہ دریا پئی آں
ٹھاٹھاں لہراں دے مونہہ گئی آں
پھڑ کے گھمن گھیر بھوئی آں
اپروں برکھا رین اندھاری
تسی کرو اساڈی کاری
کیہی ہو گئی ویدن بھاری
سیاں ایڈ چنچر چائے
تارے کھاریاں ہیٹھ چھپائے
منج دیان رسیاں نانگ بنائے
ایہناں سحراں توں بلہاری
تسی کرو اساڈی کاری
کیہی ہو گئی ویدن بھاری
ایہہ جو مرلی کاہن وجائی
دل میرے نوں چوٹ لگائی
آہ دے نعرے کردی آئی
میں روواں زارو زاری
تسی کرو اساڈی کاری
کیہی ہو گئی ویدن بھاری
عشق دیوانے لیکاں لائیاں
ڈاڈھیاں گھنیاں ستھاں پائیاں
ہاں میں بکری کول قصائیاں
رہندا سہم ہمیشہ بھاری
تسی کرو اساڈی کاری
کیہی ہو گئی ویدن بھاری
عشق روہیلہ ناہیں جچدا
اندر دھریا باہر نچدا
مینوں دیو سنیہڑا سچ دا
میری کرو کوئی غم خواری
تسی کرو اساڈی کاری
کیہی ہو گئی ویدن بھاری
میں کیہہ مہر محبت جاناں
سیاں کردیاں زور دھگانا
گل گل میوہ کہ ہدوانا
کیہہ کوئی وید پساری
تسی کرو اساڈی کاری
کیہی ہو گئی ویدن بھاری
نوشوہ جس دا بانس بریلی
ٹٹی ڈالوں رہی اکیلی
کوکے بیلے بیلی بیلی
اوہدی کرے کوئی دلداری
تسی کرو اساڈی کاری
کیہی ہو گئی ویدن بھاری
بلھا شاہ دے جے میں جاواں
اپنا سر دھرپھیر نہ پاواں
اوتھے جاواں نہ دکھ پاواں
بھیڑی اینویں عمر گزاری
تسی کرو اساڈی کاری
کیہی ہو گئی ویدن بھاری