Kalam e Waris Shah
253-254 – Jogi Banane Ke Arade
Bujhi Ishaq di agg nooN wa laggi, samaaN aaya he shoq jagaaonaiN da
Baal nath de talla da raah pharya, matta jaagia kann paraaonaiN da
Patte baal malaaiyaN naal rakhe, waqt aaya he ragar manaaonaiN da
Jurm karam tiaag ke thaap betha kisse Jogi de hath wakaaonaiN da
Bunde soinaiN de laah ke cha charhia, kann paar ke mundraaN paaonaiN da
Kisse aise gardio di tehal kariye, sehar dass de runn khaskaaonaiN da
Waris Shah miaN ehnaaN aashiqaN nooN, fikar zara na jind gawaaonaiN da
Hoka phire denda pindaN vich saare aao kisse faqeer je honaaN je
Mang khaawaN kamm na kaaj karnaaN, kujh chaar naaN nahiN chonaaN je
Zara kann paraike sawaah malni, guru saare hi jag da honaaN je
Na dehari na kasab rozgaar karnaaN, badshah phir mufat da honaaN je
NahiN deni wadhaai phir jamne di, kisse moowe nooN mool na ronaaN je
Mang khaaonaN utte mast sonaaN na kujh dionaaN te naheeN kujh lionaaN je
Naale mangnaaN te naale ghoornaN aiN, deneeN daar na kisse da honaaN je
Khushi aapni uthnaaN miaN Waris, utte apni neend hi sonaaN je
جوگی بننے کے ارادے
بجھی عشق دی اگ نوں واء لگی سماں آیا ہے شوق جگاونیں دا
بالناتھ دے ٹلہ دا راہ پھڑیا متا جاگیا کن پڑاونیں دا
پٹے پال ملائیاں نال رکھے وقت آیا ہے رگڑ مناونیں دا
جرم کرم تیاگ کے تھاپ بیٹھا کسے جوگی دے ہتھ وکاونیں دا
بندے سوئنیں دے لاہ کے چاء چڑھیا کن پاڑ کے مندراں پاونیں دا
کسے ایسے گردیودی ٹہل کریئے سحر دس دے رن کھسکاونیں دا
وارث شاہ میاں ایہناں عاشقاں نوں فکر ذرہ نہ جند گواونیں دا
ہوکا پھرے دیندا پنڈاں وچ سارے آوَ کسے فقیر جے ہووناں جے
منگ کھاواں کم نہ کاج کرناں کجھ چارناں تے نہیں چووناں جے
ذرہ کن پڑائیکے سواہ ملنی گرو سارے ہی جگ دا ہووناں جے
نہ دیہاڑی نہ کسب روزگار کرناں بادشاہ پھر مفت دا ہووناں جے
نہیں دینی ودھائی پھر جمنے دی کسے موئے نوں مول نہ رووناں جے
منگ کھاوناں اتے مست سو ناں نہ کجھ دیوناں تے نہیں کجھ لیوناں جے
نالے منگناں تے نالے گھورناں ایں دینیں دار نہ کسے دا ہووناں جے
خوشی آپنی اٹھناں میاں وارث اتے اپنی نیند ہی سووناں جے