Kalam e Waris Shah

آگ لگنے کا رد عمل

لگی اگ چو طرف جاں شہر سارے کیتا صاف سبھ جگیاں جائیاں نوں
سارے دیس وچ دھم تے شور ہویا خبراں پہنچیاں پاندھیاں راہیاں نوں
لوکاں آکھیا فقر بدعا دتی راجے بھیجیا ترت سپاہیاں نوں
پکڑ کھیڑے نوں کرو آن حاضر نہیں جان دے ضبط بادشاہیاں نوں

ہیر کھوہ کے رانجھے دے ہتھ دتی کریں جوگیا خیر دعا میاں
رانجھے ہتھ اٹھائیکے دعا دتی تو ہیں جل جلال خدا میاں
تیرے حکم تے ملک وچ خیر ہووے تیری دور ہے کل بلا میاں
ان دھن سے لچھمی حکم دولت نت ہووے ہی دون سوا میاں
گھوڑے اٹھ ہاتھی دم توپ خانے ہند سندھ تے حکم چلا میاں